Princi i paqes në një botë të trazuar!

adminDhiata e Vjeter, Krishtlindja 2018, Krishtlindja 2020Leave a Comment

“Sepse na ka lindur një fëmijë, një djalë na është dhënë. Mbi supet e tij do të mbështetet perandoria dhe do të quhet Këshilltar i admirueshëm, Perëndi i fuqishëm, Atë i përjetshëm, Princ i paqes” Isaia 9:6.

Nuk ka fjalë tjetër më  me peshë  sesa fjala paqe në një botë të trazuar. Nuk ka realitet më të dëshiruar!
Sa shpejt dhe sa shpesh na tronditet bota; sa shpesh dhe sa shpejt e humbim qetësinë, dashurinë, qetësinë; sa shpejt e humbim se kujt i përkasim.

Më bëjnë përshtypje fjalët që përdoden në Bibël referuar Jezusit dhe paqes; princ i paqes, kam ardhur të vendos paqen, paqja me ju. Mungesa e paqes në botë është një realitet bashkëshoqërues që në zanafillë.

Në historinë e njerëzimit, sipas një studimi, ka pasur vetëm 292 vite paqe. 14,350 lufta, 3.64 miliardë njerëz janë vrarë në luftëra. Vlera e pasurisë së dëmtuar do të ishte sa një brez ari rreth e përqark globit.

Por, a është paqja mungesë telashesh? A do të thotë paqe që të mos kemi shqetësime? Si ta kuptojmë paqen në perspektivën e Perëndisë?

Tregohet një histori për një vajzë që u kthye vonë në shtëpi një natë. I ati, i shqetësuar, e pyeti se ku kishte qenë. Ajo iu përgjigj se kishte shkuar te fqinja, së cilës sapo i kishte vdekur i shoqi.

“Çfarë po bëje ti atje?” – vazhdoi bisedën i ati.
“Po e ngushëlloja” – u përgjigj vajza.
“Po si e ngushëllove ti atë?”
“U ula në prehrin e saj dhe qava së bashku me të!” – u përgjigj vogëlushja.

Paqja e Perëndisë, paqja që jep Jezusi, nuk është mungesa e telasheve në botë; as mungesa e telasheve në jetën tonë, por është siguria që prania e Tij është me ne, në çdo hap të jetës.
Është siguria që prania e Zotit është me ne. Është e njëjta prani që do të përgatisë për ne një banesë, në mbretërinë e paqes.

Është i njëjti person që tha: “unë po ju lë paqen, po ju jap paqen time, po ua jap jo si e jep bota. Zemra juaj mos u trondittë dhe mos u frikësoftë.” Gjoni 14:27

Bota jonë tronditet sepse kompleksiteti është një shpikje njerëzore. Perëndia i bën gjërat më të thjeshta (jo më të lehta) dhe Perëndia do ti bëjë gjërat më të thjeshta për ata që besojnë në të.

Nëse ne kemi Jezusin, nëse kemi paqen e Perëndisë, atëherë paqe është:

  • siguria e një jetimi që dikush e pret në familje.
  • siguria e një të moshuari që mes vetmisë, indiferencës, dhimbjes së kockave dhe mungesës së dashurisë, në fund të kësaj jete të rrëmujshme, e pret një jetë në paqe e plot dashuri.
  • siguria e një të papuni se një ditë puna e vetme (nëse mund të quhet e tillë) është adhurimi i Atij që beson.
  • siguria e një të verbëri që do ta shohë Jezusin ballë për ballë një ditë.
  • siguria e një të çali se një ditë do të hidhet dhe do të kërcejë në oborret e mbretërisë.
  • siguria e atij që nuk ka asgjë në jetë që një ditë do të trashëgojë pasurinë e Zotit të jetës.
  • siguria e një adoleshenti që dikush e kupton plotësisht, edhe pa folur.
  • siguria e një kryefamiljari, që faturat e shpenzimeve mujore nuk do të egzistojnë më.
  • siguria e një të burgosuri që një ditë prangat do të thyhen.
  • siguria e një të varfëri që një ditë do të shtrohet si fisnik në oborrin e princit.
  • siguria e një nëne që lotët e saj të derdhur në shqetësime do të thahen nga përqafimi i birit.
  • siguria e vejushës se një ditë do të vishet me të bardha.
  • siguria e fëmijës se një ditë prezenca e Atit do të jetë përherë me të.
  • siguria e zemrës që një ditë nuk do të rrahë mundimshëm për të siguruar funksionimin e një trupi që prishet, por do të rrahë në një trup të përlëvduar në gëzimin e prezencës së Atit.
  • siguria e djalit që në familjen e Atit ka gjithmonë një vend për të.
  • siguria e Atij që ka humbur jetën në Zotin që do ta gjejë jetën në Zotin.
  • siguria e kishës së Perëndisë që mbretëria do të vijë, mbreti do të përlavdohet dhe adhurimi do të vazhdojë përjetësisht.
“Dhe menjëherë engjëllit iu bashkua një shumicë e ushtrisë qiellore që lëvdonte Perëndinë duke thënë: lavdi Perëndisë në vendet më të larta, paqe mbi tokë, njerëzve mbi të cilët qëndron mirëdashja e tij.” Luka 2:14

Gëzuar Krishtlindjen!

Rreth Autorit
mm

Agustin Prenga

Agustin Prenga ka mbaruar studimet për drejtësi. Eshtë drejtues i lëvizjes rinore IJR Student për Evropën Lindore dhe Rusinë, degë e Institutit Jeta e Re. Shkruan dhe mban leksione mbi çështje të besimit, zhvillimit personal dhe udhëheqësisë. Ka pasion të ndihmojë të rinjtë të arrijnë maksimumin e potencialit të tyre. I pëlqejnë librat, futbolli, ecja në natyrë dhe udhëtimet. Është shijues i thekur i kafes, ideve dhe humorit. Mund të lexoni rregullisht shkrimet e Agustinit te faqja imakiato.com.

E mirepresim komentin tuaj...