Shpëtimtari që nuk e dinim se na duhej…

adminDhiata e Re, Dhiata e Vjeter, Krishtlindja 20180 Comments

“Por engjëlli u tha atyre: ”Mos druani, sepse unë po ju lajmëroj një gëzim të madh për të gjithë popullin; sepse sot në qytetin e Davidit lindi për ju një Shpëtimtar, që është Krishti, Zoti.” Luka 2:10

Ne jemi qenie të krijuara prej një Perëndie të njohshëm që na njeh jo vetëm për emër e fytyrë. As vetëm për fjalë.

Ai di zemrën tonë, e kupton nga larg mendimin tonë, i di fjalët shumë më parë se të jenë në gojën tonë. I njohshmi, i njeh thellë të gjitha rrugët tona. (Psalmi 139:1-4)

Përballë këtij realiteti qëndron realiteti ynë, i një vetënjohurie në dukje të madhe. E njohim apo jo Zotin që na ka krijuar, e besojmë apo jo, gjithmonë kemi një listë të madhe me dëshira, nevoja, kërkesa që presim të na përmbushen. Lutemi të na bëhen pjesë e jetës tonë për të na e bërë jetën më të mirë.

Teksa isha duke rilexuar këtë periudhë Krishtlindjeje historinë e lindjes së Jezusit, zemra m’u mbush me mirënjohje e siguri kur kujtova se me lindjen e Shpëtimtarit, na është plotësuar tashmë prej Perëndise nevoja më e madhe që ne kemi.

“Por engjëlli u tha atyre: ”Mos druani, sepse unë po ju lajmëroj një gëzim të madh për të gjithë popullin; sepse sot në qytetin e Davidit lindi për ju një Shpëtimtar, që është Krishti, Zoti.”

Krishti lindi për të na shpëtuar nga vdekja, kur ne ende ishim të verbër nga mëkati. Ai erdhi dhe e bëri veten të njohshëm e të prekshëm, për ta bërë nevojën tonë më të madhe, një nevojë të përmbushur.

Shpëtimtari u premtua kur ne ende nuk e kishim kuptuar se na duhej nje Shpëtimtar.

Ai lindi pa qenë ne ende të vetëdijshëm për nevojën që kishim e do të kishim, që sot e përjetë, jeta jonë të jetë më e mirë. Ky Perëndi që di përtej njohurisë tonë dhe jep përtej njohurisë tonë, është i njejti Perëndi që siguron për nevojat tona edhe sot.
Sot, festojmë që përkujdesi i Tij, është i plotë dhe i vërtetë.

Gëzuar Krishtlindjen!

Photo Credit: Jaron Johns

Rreth Autorit
mm

Ortensia Qeraj

Ortensia Qeraj është nga Berati. Ka mbaruar studimet Bachelor për Infermieri të Përgjithshme në Tiranë. Prej dy vitesh, i është bashkuar stafit të Institutit Jeta e Re, duke ndihmuar studentët të gjejnë jetë në Krishtin. I pëlqen arti dhe çdo gjë që ka të bëjë me krijimin.

E mirepresim komentin tuaj...